仙道彬兄講起垃圾話呢個話題，篇文我睇到津津有味，啲片就笑死。我都一樣覺得近年NBA實在過份斯文、太講marketing，或者直接啲講 — 唔夠火。
即係咁，All Star Game 理論上係雲集籃球界別世上最強好手，但係佢地合演嘅All Star Game 竟然唔係精采絕倫，只係長年淪爲互相讓路給敵軍隨便表演入樽*、比分加埋幾乎過300分嘅畀面派對。但係90年代果啲All Star Game，真係會打到起火動真格，好睇到！喂，梗係想睇Barkley 硬爆MJ 然後trash talk 佢，多過睇球員開路比LeBron 表演入樽…
但同時都要講，NBA嘅營運同條例都係非常關鍵。NBA近年嘅球賽執法根本不容許球員對球證有任何質疑 – 即使球證明顯錯咗，再講多兩講就食T，仲繼續講就提早收工離場添。
NBA亦不再寬容處理球員之間嘅身體碰撞，球員稍爲有少少推撞就會被判罰處分。我當然唔係鼓吹暴力籃球，而且球場打交亦根本唔好睇 (我睇MMA好過啦)。我只係覺得：睇波梗係想睇籃球場上嘅狂野激鬥*架啦！
[totalpoll id=”27530″]
註1：今年明星賽就幾好睇。
註2：但當然唔希望見到有人受傷。
外國網民都係咁覺得：https://www.reddit.com/r/nba/comments/3d3sue/why_isnt_there_that_much_defense_played_in_the/
