兩支上季西岸勁旅快艇同馬刺,今季走勢都係普普通通,賽前快艇 (4-2) 同馬刺(2-3) 係西岸暫時未見標青。一如賽前預計將會係一場好緊湊攻防戰。

今場兩隊都比較慢熱,特別係馬刺拿手既空檔三分都失晒準。平時神準既射手群(特別係Green,Bonner)上半場三分十二投全失。快艇頭三節靠住Griffin 同出乎意料既Redick 頻頻攻入內線製造威脅,成場波從未落後。但末段馬刺靠住Big 4 + Diaw 打出一波 12-0 攻勢,鎖定勝局。上季決賽MVP Kawhi Leonard 打出今季暫時代表作,交出 26分 10籃板6助攻3搶斷,包括第四節一次係Chris Paul 手中關鍵既偷球。

呢場波 Coach Pop 繼續佢既「常規賽實驗」,進攻多次將球權配俾 Leonard 做單打或者分波,佢亦不負所託以高效中投以及水準以上既傳球視野,幫馬刺一路緊追,可見Kawhi未受續約事宜所影響。如果餘下賽季保持住呢個表現,明年暑假將成為受限自由球員既佢,必引來多支球隊頂薪追逐。

馬刺今日既勝利,可以話係”醜陋勝仗”既完美演繹。全場以只係低於四成命中率,三分10.5% 及罰球低於80% 均於水準之下。靠既就係教科書式既ball movement 不斷為隊友尋找籃下空檔,第二至第三節亦都無俾快艇既進攻節奏控制住,拖返慢黎打返佢地拿手既半場進攻,比數一路咬住唔放。第四節 clutch time 部署亦應記一功,雙人包夾 Chris Paul 令快艇進攻不知所措,Crawford 今場冰冷手感同Griffin 關鍵時刻既猶疑,導致多個攻勢以tough shot 及失誤作結。今場勝仗盡顯「四巨頭」韌性及 Coach Pop 臨場功力。

相對而言快艇如果想走得更遠,第四節關鍵時候既進攻必須改善。快艇球迷們對上季Game 5 &6敗走雷霆應該記憶猶新。當球隊決定包夾CP3,不能再以單打及跟Griffin的2-man game 攻城: 快艇仲有無一個可靠既 secondary option可以勝任製造攻勢及自我創造得分機會?上年仍然有Darren Collison呢位奇兵,可惜已遠走帝王。觀乎現時快艇陣中,只有Crawford 比較令人信任,但Crawford連年進攻穩定性忽冷忽熱,傳球視野亦偏差,是否要將球賽押注他一人身上? Redick, Matt Barnes, Bullock 都係需要被供應的得分手,Turkoglu 年華老去,Farmar多年來於湖人及歐洲打滾已被證明不勝大任。快艇若果想走得更遠,可能需要Griffin 再來一個「超進化」,Doc Rivers 於陣容及第四節的調動與部署上亦要再動動腦筋如何求變。