難得一次睇NBA球星的機會,難得可以在紅館睇籃球,結果火箭、馬刺及雷霆球員全部不見,半價甚至三折都冇人買,最後一刻才找Vince Carter補飛。結果是球迷投訴,要宣佈退飛,最慘是派飛都坐唔滿紅館,認真失禮。

民政事務局使成1000萬公帑,最後搞成咁,買飛入場的球迷,唔好講係咪7,800蚊,會唔會激到心臟病發?第三節變左細路仔比賽,就算係傳統,考慮到票價同吸引力,加上最後個陣不符預期,係咪安排在中場玩會更合理?咁樣球迷都會樂於鼓掌。比賽係咪貨不對辦?大家都有公論吧!

慈善賽好事變壞事,搞得咁難睇,原本我仲諗,今次搞得好,可能第日香港會有機會主辦China Game,咁樣先係球迷之福,家陣一鑊粥無人認頭,直情係「籃球版高鐵」。年年咁樣納稅,睇住D錢擲晒落海,可唔可以用D錢去幫下貧苦,起下醫院,而唔係大白象,「回歸盃」?唔好話香港人鍾意投訴,你做件事,對得起人,對得起自己嘛?

見微知著,其實回歸搞過好多次體育活動,97年,國際足協明星隊及亞洲足協明星隊,大球場踢,雖然坐唔滿,但口碑不錯,香港球員有份踢亞洲明星隊,我覺得唔錯,亦有份入場;02年,戲碼弱左,主隊派出港聯,有南非、土耳其同蘇格蘭,星味爭D,但土耳其最後成為世盃季軍,估佢唔到,可以話主辦單位有先見之明。

到07年,回歸十周年,所以大搞,足足有三場波,有香港明星隊對中國明星隊;有拜仁對聖保羅,仲有場中港聯隊對世界明星隊,好唔錯。唔講足球,2000年的鑽石盃,我都有入場,有中國,有香港,有澳洲、南斯拉夫、意大利同加拿大,我當然有去睇,姚明、大郅、Peja等都有份,個個都爭住睇。更加唔好講03年皇馬訪港,當年政府應承包底,最後使左近4,000萬請左六仔條煙的皇馬來港,簡直係全城撲飛,轟動全港。單係一個慈善晚宴,籌得的善款我諗點都多過今次。
話NBA球員轉會受傷所以來不到,其實早點腳踏實地,唔好講到Kawhi Leonard或者James Harden,搵退休球星嚟,好似之前澳門或中國的傳奇賽咁,球迷反應一定好好多。

今日再睇下呢場波,只能惋歎,回歸多年,唔止政治民生搞唔好,連體育活動,都江河日下;眼界如何,執行如何,結果如何,真係只能扼腕,歎息再三。

好在一炮過,唔使每個月8,000萬營運咋。

仙道彬
《蘋果》籃球專欄作家,情迷NBA,執着本地籃球,最愛落場打波。為九十年代的籃球、漫畫、電影、音樂,還有美好的香港着迷。
仙道彬